Rəqəmsal Tibbi Həllər

Xəstəxana İdarəetmə Sistemi – çoxfunksiyalı bu sistem vasitəsilə tibb müəssisəsindəki bütün tibbi proseslərin tam şəkildə elektronlaşdırılması, həmçinin müxtəlif funksiyalı tibbi cihazların inteqrasiyası eyni zamanda digər elektron sistemlər ilə qarşılıqlı məlumat mübadiləsi təşkil edilmişdir.

Beynəlxalq nüfuza malik HIMSS təşkilatının EMRAM 6 akkreditasiya sertifikatı Cənubi Qafqazda ilk dəfə olaraq TƏBİB-in tabeliyində fəaliyyət göstərən “Yeni Klinika” publik hüquqi şəxs üçün əldə edilmişdir. Sözügedən sertifikat rəqəmsal xəstəxana standartlarını ən üst səviyyədə tətbiq edə bilən tibb müəssisələrinə təqdim edilir. Bu sertfikatın əldə edilməsi üçün icra edilən layihə çərvisində Yeni Klinikada iş prosesində önəmli texnoloji yeniliklər həyata keçirilmişdir. Layihə nəticəsində həm klinikanın daxilində qurulan rəqəmsal imkanlar üzrə, həm də vətəndaşlarla bağlı iş prosesinin inkişaf etdirilməsi istiqamətində böyük üstünlüklər qazanılmışdır. Müvafiq sertifikatın əldə edilmiəsi üçün bir sıra beynəlxalq rəqəmsal tibbi standartlar hazırlanıb tətbiq edilmişdir. Müvafiq rəqəmsal standartların tətbiqi ilə xidmət kefiyyətinin yüksəldilməsi, pasiyent təhlükəsizliyinin təmin edilməsi, tibbi personalın təcrübəsinin genişləndirilməsi, iqtisadi səmərənin artması, pasiyentlərin sözün yaxşı mənasında müalicə prosesinə daxil edilməsi və sairə istiqamətlər üzrə yaxşı nəticələr əldə edilmiş və ən önəmlisi Azərbaycan səhiyyəsinin beynəlxalq aləmdə tanınması istiqamətində uğurlu addımlar atılmışdır.

İşə qəbul olunanlar və ali məktəblərə, kolleclərə, liseylərə daxil olan abituriyentlər üçün sağlamlıq haqqında arayı eyni zamanda sürücülük vəsiqəsinin əldə edilməsi üçün təqdim edilən sürücülüyə yararlı olmaq haqqında tibbi arayış nümunələrinin elektron forması yaradılmışdır. Bu layihənin icrası vətəndaşlar üçün sözügedən arayış nümunələrinin elektron versiyalarını əlçatan etmişdir. “E-TABİB” mobil tətbiqi və http://kabinet.its.gov.az/ veb-səhifəsindəki şəxsi kabinetlərinin müvafiq bölmələrindən TƏBİB-in tabeliyində fəaliyyət göstərən tibb müəssisələri tərəfindən təqdim edilən bu arayışların elektron versiyalarının əldə edilməsi mümkündür. Sağlamlıq və Sürücülüyə yararlı olmaq barədə olan arayış nümunələrinin vətəndaşlar üçün əlçatanlığının təmin edilməsi məqsədilə sözügedən arayış nümunələrinin elektron verisyaları hazırlanmış, həmçinin zəruri məlumatlar üzrə Daxili İşlər və Əmək və Əhalinin Sosial Müdafiəsi Nazirliklərinin əlaqəli sistemləri ilə məlumat mübadilələri həyata keçirilmişdir

E-tabib mobil tətbiqi layihəsi nəticəsində vətəndaşların aldıqları tibbi xidmətlər barəsində məlumatın əldə edilməsi, TƏBİB-ə bağlı tibb müəssisələrində tibbi xidmət əldə etmək üçün online növbənin yaradılması, laborator analizlərin nəticələrinin online əldə edilməsi, elektron arayışların əldə edilməsi, tibbi göndərişlərin əlçatanlığı və s. kimi önəmli funksionallıqları əhatə edən və müasir standartlara cavab verən mobil tətbiq hazırlanaraq vətəndaşların istifadəsinə verilmişdir.

“Tibbi Ərazi Bölmələrini İdarəetmə Birliyi” publik hüquqi şəxsin (TƏBİB) tabeliyindəki tibb müəssisələrinə tibb və qeyri-tibb işçilərinin işə qəbulu üzrə işə qəbul prosesinin optimallaşdırılmasının təmin edilməsi məqsədilə “Karyera portalı” yaradılmışdır. TƏBİB-in tabeliyindəki tibb müəssisələrinin həmin portala çıxışı təmin olunmuşdur. Tibb müəssisələri tərəfindən tibb və qeyri-tibb vəzifələri üzrə müvafiq vakansiyalar haqqında elanlar “Karyera portalı”nda yerləşdiriləcəkdir. Namizədlər üçün portalda qeydiyyatdan keçməklə şəxsi kabinet formalaşdırmaq və müvafiq vakansiyalara müraciət edə bilmək imkanı yaradılmışdır.